jarduerak

2011ko deialdia

Anton Abbadia saria, Kultura eta Euskara Departamentuarena

Kultura eta Euskara Departamentuko foru diputatuak 2011ko maiatzaren 24ko dataz 1010/197/2011 zenbakidun foru agindu hau eman du.

Gipuzkoako Foru Aldundiak 1996ko azaroaren 29an emandako foru aginduaren bitartez (Gipuzkoako Aldizkari Ofiziala, 242 zk., 1996ko abenduak 17) Anton Abbadia saria sortu zuen, euskararen normalkuntzaren aldeko lanetan nabarmendutako pertsona edo elkarteen jarduna jende aurrean aitortu eta saritu nahirik.

Aipatutako foru agindu horren bigarren puntuak xedatzen zuenez, Anton Abbadia sariaren deia, oinarriak eta jasotzaile izan daitezkeen elkarte edo pertsonen zehaztapena urtero emango dira jakitera, foru agindu bidez.

Horren indarrez, Kultura eta Euskara Departamentuko foru diputatuak,

EBAZTEN DU

Lehenengo: Anton Abbadia sariaren deia egitea 2011. urterako, euskararen erabilera sustatzeko alorrean nabarmendu izan diren pertsona edo elkarteen jarduna saritzeko asmoz.

Bigarren: Anton Abbadia sariaren 2011ko edizioa gidatuko duten oinarri arautzaileak onartzea, foru agindu honekin batera doan eranskinean jasotakoaren arabera.

Hirugarren: Hamabi mila (12.000,00) euroko gastua baimentzea, aurrekontuko 1.1010.100.481.00.03 2011 kontu sailaren kargura.

Laugarren: Anton Abbadia saria aurtengo edizioan 2011ko abenduaren 2an emango da.

Bosgarren: Anton Abbadia sariaren 2011ko edizioan hautagaiak aurkezteko epea ekainaren 30ean amaituko da.

Seigarren: Foru agindu hau behin betikoa da eta amaiera ematen dio administrazio bideari. Interesatuek foru agindu honen aurka Administrazioarekiko auzi errekurtsoa aurkez dezakete Donostiako administrazioarekiko auzietako epaitegietan, jakinarazpenaren biharamunetik hasita bi hilabeteko epean.

Hala ere, partikularrek aukera dute horren aurretik berraztertzeko hautazko errekurtsoa aurkezteko Kultura eta Euskara foru diputatuari, jakinarazpenaren biharamunetik hasita hilabeteko epean. Hori eginez gero, ezingo da administrazioarekiko auzi errekurtsorik aurkeztu harik eta berraztertzekoaren berariazko ebazpena eman edo ustezko ezespena gertatu arte. Dena dela, egoki iritzitako beste edozein errekurtso aurkez daiteke.

Donostia, 2011ko maiatzaren 24an. -Ana Urkola, idazkari teknikoa.

Eranskina

Kultura eta Euskara Departamentuak eratutako Anton Abbadia sariaren 2011. urteko edizioaren oinarri arautzaileak.

1.- Xedea

Oinarri hauen xedea da Anton Abbadia sariaren 2011. urteko edizioaren deialdia egitea.

Anton Abbadia saria euskararen gizarte erabilera babestu, sustatu edo hedatzeko kultur zereginetan nabarmendu diren erakunde, elkarte edo pertsona fisiko nahiz juridikoei eman ahal izango zaie.

Saria emateko kontuan hartuko dira saritutako lan edo jardueraren kalitatea eta esanahia, eta euskararen normalkuntzaren alor guztietan egindako ekarpena.

Halaber, saria ematerakoan oso gogoan izango da pertsona edo elkartearen orain arteko ibilbidea eta jarraitasuna.

Saria jendaurreko ekintza batean emana izango da, 2011ko abenduaren 2an.

2.- Sariaren edukia

Saria izango da Xabier Laka eskultoreak sortutako domina oroigarria eta 12.000 euroko diru kopurua.

Halaber, saridunaren lana gizarteratzeko ekimenak bideratuko ditu Gipuzkoako Foru Aldundiak, saria eman eta hurrengo urtean.

3.- Baldintzak

Anton Abbadia sarirako hautagaiak aurkezteko baldintza hauek kontuan izan behar dira:

Hautagaia pertsona fisikoa izatekotan, ez dago hildakoren baten aldeko proposamena aurkezterik.
Aurkeztutako hautagaiak gipuzkoarra izan behar du sortzez, edo Gipuzkoan finkatutakoa bizitzaz nahiz jardunbidez.

4.- Hautagaiak aurkeztea

Saria jasotzeko hautagaiak aurkeztu ahal izango dituzte:

Pertsona juridikoek, gutxienez bi erakunde edo elkarteek batera hautagai bakarra babestu eta aurkezten badute.
Hurrengo puntuan azaltzen den epaimahaiak.
Gipuzkoako Foru Aldundiko Kultura eta Euskara Departamentuak.

Epaimahaiak bere iritzia osatzeko bidea izan dezan, hautagaien proposamenetan argi azaldu beharko dira aurkeztutako hautagaien merezimenduak, Anton Abbadia sariak dituen helburuei dagokienez.

Hautagaiak 2011ko ekainaren 30a baino lehenago aurkeztu behar dira, onartuak diren orri ofizialetan.

5.- Epaimahaia

Anton Abbadia sarian aurkeztutako hautagaien merezimenduak epaimahai batek aztertu eta baloratuko ditu. Epaimahaia honela osatuko da:

Mahaiburu:

Gipuzkoako Foru Aldundiko Kultura eta Euskara Departamentuko foru diputatua.

Mahaikide: Epaimahaiko kide izango dira:

Euskarako zuzendari nagusia.
Euskararen alorrean itzal handiko hiru aditu, Gipuzkoako Foru Aldundiko Kultura eta Euskara Departamentuko foru diputatuak izendaturik.
Sariaren aurreko bi edizioetan saria jasotako pertsonak edo elkarteen ordezkariak.

Idazkari:

Gipuzkoako Foru Aldundiko Kultura eta Euskara Departamentuko funtzionario bat izango da epaimahaiko idazkari; hizpidea izango du, baina botorik ez.

Epaimahaia osatuko dutenen zerrenda Kultura eta Euskara Departamentuko foru diputatuaren aginduz erabaki, eta Gipuzkoako Aldizkari Ofizialean argitaratuko da behar den garaian.

6.- Hautagaiak baloratzea

Epaimahaiaren zeregina izango da aurkeztutako hautagaien merezimenduak aztertu eta baloratu ondoren saritarako proposamena egitea, sariaren helburuak eta hautagai diren pertsona edo elkarteen jardunaren kalitatea eta ibilbidea kontuan izanda.

Laugarren oinarrian adierazi bezala, era baten zein bestean aurkeztutako hautagai guztien kasuan epaimahaiak isilpeko espediente bana osatuko du, aurkeztutako hautagaiaren merezimenduak aztertu eta kreditatzeko behar diren eginbideez. Horretarako, epaimahaiak bere kideen artetik espediente bakoitza osatuko duen epaimahaikide bat bereiz dezake, informazio aldia amaitu ondoren burututako eginbideak eta bildutako frogak epaimahaiari berari aurkez diezazkion.

Behar den hausnarketa eginik, mahaiburuak erabakiko du saria ematea, epaimahaiak egindako proposamenean oinarrituta.

Epaimahaien artean botoen parekotasuna gertatuko balitz, epaimahaiburuak izango du erabakitzeko ahalmena.

Epaimahaiak saria eman gabe uztea proposatu dezake. Baita ere, epaimahaiak bere esku izango du ohorezko aipamenak izendatzeko proposatzea.

Epaimahaiak egindako bilera guztien akta jasoko du idazkariak

Epaimahaiak bere proposamena aurkezteko gehienezko epea 2011ko urriaren 1a izango da.

7.- Aurrekontua, programa eta kontusaila

Oinarri hauetan araututako saria emateko izendatu diren kredituen zenbatekoa 12.000 euro da, eta 1.1010.100.481.00.03 2011 aurrekontu sailaren kargura joango da.

Dokumentuak: