News
Estibaliz Alkorta, euskarako zuzendari berria
Estibaliz Alkorta Barragan lasartearra izendatu du Gipuzkoako Foru Aldundiak Euskarako zuzendari nagusi.
Lasarte-Orian jaioa 1974an, ingeniaritza tekniko industrialeko ikasketak eginak ditu, eta enpresa batean kalitate kudeatzaile gisa lan egin du orain arte. Euzko Alderdi Jeltzaleko kidea da eta 2003-2007 bitartean alderdi horretako zinegotzia izan da Lasarte-Oriako Udalean. Bi seme-alaba ditu.
Gipuzkoako Foru Aldundiaren egitura berrian, Kultura eta Euskara Departamentuaren barruan egongo da Estibaliz Alkortaren ardura izango den Euskara Zuzendaritza Nagusia. Departamentuaren buru, Maria Jesus Aranburu Orbegozo azpeitiarra izango da, Irakasle Eskolan diplomatua, eta lehenagotik Aldundian beste kargu batzuk izan dituena (Kultura diputatua 1991-1995 bitartean, Gizartekintzako zuzendaria 1995-1999 bitartean, eta Kultura zuzendaria 1999-2003 bitartean.
Albiste honi lotutako jakingarriak:
- 2007ko uztailaren 11ko 60/2007 Foru Dekretua, Gipuzkoako Foru Aldundiko departamentuak eta horiei dagozkien eginkizun eta jarduera esparruak zehaztekoa
- 2007ko uztailaren 11ko 61/07 Foru Dekretua, foru diputatuak nahiz diputatu nagusiordeak izendatzekoa, eta Diputatuen Kontseiluko Idazkaritza hautatzekoa
- 2007ko uztailaren 24ko 96/07 Foru Dekretua, Euskarako zuzendari nagusia izendatzekoa
