Gipuzkoako Foru Aldundiak Kutxabanki eskatuko dio euskara alorrean atzerapauso gehiago ez emateko eta normalizazioaren alde egiteko

Euskarako zuzendari Zigor Etxeburuak Gipuzkoako erabiltzaile askoren kezka helaraziko dio finantza entitateko arduradunari, euskarazko zerbitzuak okerrera egin baitu nabarmen.

Euskarak Kutxan lortutako posizionamendu ona galdu egin da, hiru entitateek Kutxabanken bat egin dutenez geroztik. Gipuzkoan behintzat euskarazko zerbitzuak okerrera egin duenez, eta horrek kexa ugari sortu dituenez, Gipuzkoako Foru Aldundiko Euskarako zuzendari Zigor Etxeburua Kutxabankeko Komunikazio zuzendari Jon Mancisidorekin elkartuko da gaur. Etxeburuak kezkaren berri emango dio, eta jarreraz aldatzeko eskatuko dio.

“Gutxienez, aurreko posiziora itzultzeko eskatu behar diogu Kutxabanki, Kutxako entitate sortzailea garen aldetik. Gutxienez hori. Lehengo egoerak euskararen garapen osoa bermatzen ez bazuen ere, euskarak Kutxan posizionamendu ona lortu zuen” adierazi du Zigor Etxeburuak.

Kutxabanken Gipuzkoaren egoera soziolinguistikoa ez dela islatzen uste du Etxeburuak. “Kezka adierazi nahi dugu, Kutxabanken hizkuntza irizpideek euskararen alde egindako urratsak erabat kaltetzen baitituzte. Kutxabankek egin dituen urratsen bidez herritarrei adierazten die euskara ez dela garrantzitsua”. Euskararen aldeko neurri proaktiboak baztertu egin dituztela eta euskaldunari gauzak zaildu dizkiotela aipatu du.

Kutxabank eratu denez geroztik, harreran euskaraz ez dakiten langileak jarri dituzte, komunikazioetan hizkuntzaren kalitateak behera egin du, akats ugari antzeman daitezke eta irudi korporatiboan euskarak garrantzia galdu du. Horrek haserrea eragin du erabiltzaile askoren artean. Kexa ugari plazaratu dira eta horietako asko zuzenean iritsi dira Gipuzkoako Foru Aldundira. Agerikoa da Kutxabankek ez duela euskaratik sortzen. Entitatearen barne jardueretan ere zailagoa da orain euskaraz lan egitea. Lehen, euskaraz lan egitea toleratzen zuen jarrera zegoen Gipuzkoan, baina orain desagertu egin da.

Iraganean euskara hedatzeko konpromisoak

Gipuzkoako Kutxak euskararen erabilera areagotzeko zenbait hitzarmen sinatuak zituen lurraldeko hainbat erakunde publikorekin. 2007an Aldundiarekin eta Eudelekin hitzartu zuen elkarren arteko harremanak euskaraz izatea eta Gipuzkoako herrietan euskararen erabilerari hedapen sozial zabalagoa ematea. Horrez gain, udal batzuekin ere hitzarmenak sinatu zituen, hala nola Buruntzaldeko udalekin, Urola Kostako udalekin, eta Debagoienekoekin. Orain arte egindakoa galtzea akats historikoa litzateke Etxeburuaren iritziz.